1 Samuel 20

David bona Ionatan

1Bena David na Naioto Rama amo e heau, Ionatan dekena ela, eto, Lau be ede vada na kara toma? Egu dika be dahaka? Tamamu vairanai ede na kerere toma, bena ia ese egu mauri iabi-ohona dalana etahuamu? 2Ionatan ese e haere henia, eto, Lasi vaitani; oi na basio mase. A itaia tamagu na ḡau badana ta eiava ḡau maraḡina ta se karaiamu, a lau e hadibagu gunamu. Dahaka dainai tamagu na ina gau egu amo baine hunia? Unu basine kara toma. 3A David ese ena hereva e ha-aukaia, eto, Tamamu na dibana oi ese o lalo namo henigumu, bena e tomamu “Ina na Ionatan basine diba, lalona baine hisihisi na garina”. A momokani. Iehova e maurimu bona oi laumamu e maurimu heḡereḡerena, lau bona mase padamai ai na daḡa tamona na heto. 4Bena Ionatan ese David e hamaoroa, eto, Dahaka ba gwauraia, una na baina karaia oiemu.

5Bena David ese lonatan e hamaoroa, eto, A itaia, kerukeru na hua matamatana; bena lau na pavapava ida ena aniani patana ai baiama helai. A mani bainala, hanua murimurinai baina noho hehuni ela bona adorahi ihatoina ai. 6Bena tamamu bema herevalaigu, lau na lasihigu dainai, baoto “David ese e noigu goada-goada, ena hanua Betelehem baine heau lao eto; badina be laḡani ta ta amo ena iduhu idoinai boubou karana e karaiamu ina nega ai.” 7Bena ia baineto “Namo”, vada baine namo emu hesiai tauna egu ai: a bema badu, vada ba diba ia na kara dikana ta e haeroamu. 8Taunabunai, emu hesiai tauna ba bogagu hisi, badina be emu hesiai tauna ida vada ta herohemaino, Iehova ena herohemaino ai. A bema mai egu kerere, oi sibomu bavalagu mase. Anina be dahaka tamamu dekenai ba hakaugu lao? 9Ionatan e haere, eto, Lasi ona lasi vaitani. Bama diba tamagu ese kara dikana ta e haeroamu emu ai, bama hamaoromu ani? 10David ese Ionatan e nanadaia, eto, Tamamu na badu herevadia bema gwaurai henimu, daika ese bema hamaorogu? 11Ionatan ese David e hamaoroa, eto, Aoma, hanua murimurina aitala. Taunabunai raruosi na hanua murimurina ela.

12Bena Ionatan ese David e hamaoroa, eto, Iehova, Israel Diravana vairanai na herevamu! tamagu lalona do baina tahua, bena nega inihetomana, kerukeru eiava vanegai, bema oi David e lalo namo henimumu, lau ese gwau-kau baina siaia, baina hadibamu, ani? 13A tamagu ese oi ihadikamu urana bema ura, bona lau ese basinama hadibamu bona basinama siaimu oho, mauri ba davaria helaoreana, Iehova ese lau Ionatan do baine hadava henigu, bona ma baine habadaia. Iehova ese oi baine bamomu, tamagu e bamoava heḡereḡerena. 14Do bama mauri, Iehova ena hebogahisi heḡereḡerena ai ba bogagu hisi, basinama mase; 15bona emu hebogahisi na egu ruma taudia edia amo basio abia oho, ela bona hanaihanai. Iehova ese David inaina iboudiai na tanobada kopina amo baine negedia daure negana ai, 16lonatan ladana na David ena ruma amo basine henege daure. Iehova ese David inaina ediai dava baine abia. 17Bena lonatan ese gwauhamata na David ena amo ma e abia, ena lalokau dainai; badina be ia ese e lalokau heniava, ia sibona e helalokau heniva heḡereḡerena.

18Ionatan ese e hereva henia lou, eto, Kerukeru na hua matamatana; bena bae herevalaimu, emu helai gabuna na asi tauna dainai. 19Ma vanegai bae herevalaimu bada; una dina ai baola haraḡa, o komu guna gabuna baola, nadi ladana Esele badinai ba noho. 20Lau ese diba toi baina kinodia una nadi badinai baela, e kara ḡau ta baina tarakia na heto. 21Bena egu mero baina siaia, bainato “Aola, diba ba tahudia”. Mero na bama hamaoroa, bama toma “A itaia, diba na inikahamu ai, avabidia”, oi na do baoma, badina be Iehova e maurimu heḡereḡerena dika ta emu ai basine kau. 22A mero na bama hamaoroa, bama toma “A itaia, diba na unukahamu ai”, oi na do baola, badina be Iehova ese e siaimu ohomu. 23A ba laloa, ita raruosi vada ta herevalaia ḡauna ai Iehova na oi bona lau padadai ela bona hanaihanai.

24Taunabunai, David na hanua murimurinai e noho hehuni. Bena hua matamatana negana ai, pavapava na e helai diho, baine aniani totona. 25Pavapava na vaia ena kara heḡereḡerena ena helai ḡauna ai e helai diho, haba badibadinai. Ionatan na ia ida e hevaira heheni, bona Abnere na Saulo ohenai e helai, a David ena gabu na asi tauna. 26Una dina ai Saulo na hereva ta se gwauraia, badina be ia ese lalona e hadaia, eto, Kara ta ienai vada e vara dainai ia na dia ḡoeva; momokani, ia na dia ḡoeva.

27A dina iharuana, hua matamatana dinana murina dinana ai, David ena gabu na asi tauna. Bena Saulo ese natuna Ionatan e nanadaia, eto, Dahaka dainai Iese natuna na aniani gabuna sema, varani bona hari? 28Bena Ionatan ese Saulo e haere henia, eto, David ese e noigu goadagoada, Betelehem bainela eto; 29ia eto “Ba kahugu nege, badina be egu iduhu taudia na hanua ai boubou karana ta e karaiamu, bona kakagu ese vada e haḡanigu, bainala e tomu; taunabunai, boma lalo namo henigu, boma kahugu nege, bena kakagu bama ha itadia”. Una dainai, ia na pavapava ena pata se mai heniamu.

30Bena Saulo e badu ḡaraḡara, Ionatan e badu henia; bena e gwau henia, eto, Oi na kara gageva-gageva bona gwau-edeede hahinena natuna; oi nao tomu lau na asi dibagu oi ese Iese natuna vada o abia hidi, oi ihahemaraimu bona sinamu tau-anina ihahemaraina ai bainela. 31Badina be hari Iese natuna na tanobada ai baine noho negana ai, oi na basio gini, bona emu basileia danu basine gini. Taunabunai gwau-kau ba siaia, bainema; bena dekegu ba hakaua mai, badina be ia na momokani do baine mase.

32Ionatan ese tamana Saulo e haere henia, eto, Dahaka dainai baine mase? Ede vada e kara toma? 33A Saulo ese ena io e tahoa, baine gwadaia eto; unu amo lonatan vada e diba, tamana ese lalona vada e ha-aukaiaDavid baine alaia mase. 34Bena Ionatan e badu dikadika, e tore isi, pata e rakatania; hua ena dina iharuana ai ia na e ani vaga, bona lalona e hisihisiva David dainai; badina be tamana ese hemarai karana e kara henia.

35Daba ai Ionatan na hanua murimurina ela, David ida e hegwauhamata heheni heḡereḡerena. Mero maraḡina ta be ia ida ela. 36Bena ia ese ena mero e hamaoroa, eto, A heau lao, baina kino dibadia ba tahudia. Mero na e heau ai, Ionatan ese diba ta e kinoa, hari mero unukahana ai. 37Bena mero na diba e moru gabuna ai e kau negana ai, lonatan ese mero na e boi henia, eto, Diba na unukahamu ai a? 38Bena Ionatan ese mero na ma e boi henia, eto, A kara haraḡa, legamu ba gadaia, basio halahe. Taunabunai, Ionatan ena mero ese diba e haboudia, biaguna dekena e lou ela. 39A mero na ḡau ta asi dibana; Ionatan bona David sibodia mo una kara anina mai dibadia.

40Bena Ionatan ese ena peva bona ena diba na ena mero e henia, eto, Aola, ba laohaidia hanua ai. 41Mero na e raka oho, bena David na nadi senuna badibadina amo e tore isi, tano ai e goru diho, nega toi e igo diho. Bena raruosi e haherahu heheni bona e taitai hebou, ela bona David na taitai ai e herea. 42Bena Ionatan ese David e hamaoroa, eto, Mai mainomu ida aola; badina be ita raruosi na Iehova ladana ai vada ta hegwauhamata heheni, tato Iehova na lau bona oi padadai bona lau garagu bona oi garamu padadiai ela bona hanaihanai. Bena David e tore isi, e raka oho; a Ionatan na hanua e lou henia.